Dear, ZoPhei u nau dih lak, PaThian min in nan kut kan tlai hma sa hna, Nan um nak hmunhma ceu ah nan dam dih lai dah. Hi ban tuk a sung luai tuk mi caan ah kan pa, kan u le tam pi nan um ko nain can nan ka pek ve caah caan tlai tu le u pa menbar nan dih lak cungah kai lom tuk hrin hran, Ca ttial bal lo kan si caah kan palh mi tam pi a um lai i rak kan ngai thiam hram uh tiah kan nawl hna. TLANGTAR PATHIAN CAWI THLAI NAK AH KAN TLING HNGA MAW? Bible cang thim; Daniel 5:28 tekel ti cu cawithlai nak ah thlai na si cang i , na tling ti lo ti kha hmuh asi cang, ti nak a si. u- parsin ti cu,na pen nak cu cheu a si cang, ti nak a si i Media mi le Parsia mi kha pek an si cang, ti a si, tiah a ti. Phungthlukbia; 14:34 Miphun a lianngantertu cu din nak a si, sual nak cu zei mi phun poh caah ningzahnak a si. ZoPhei miphun kan tuanbia cu chim hau lo in keimah nak in a thei deuh mi long te nan si ko. Kan nu kan pa nih an kan chim ban tuk a si ahcun, a tu kan sining, kan dir hmun he vun tahchunh ahcun Van le Vawlei in ai thlau cang kan ti ko lai. Phun dang deuh in kan chim a si ahcun hlan lio hmai ah cun kan tthang cho tuk cang kan ti ko lai. Vawlei cung fimthiam nak lei ah Vawlei cung level in kan u, kan pa, kan fa le zong an um ve cang i, PaThian lam hruai nak thong in EU ram zongah khua a sa mi kan um ve cang, Hmai lei zongah PaThian nih lam a kan hruai a si ah cun kan tthang cuahmah lai ti mi hi ruahchan nak tam pi ka ngei, Hlan lio kan sining he cawi thlai ah cun kan rit tuk cang ti nak a si. A si na in PaThian cawi thlai nak ah kan tling hnga maw? ti hi ruah a hau ngaingai. Danial 1, in tanglei kan vun rel a si ahcun Babilon siangpahrang Nebukhadnezzar nih Jerusalem a rak tuk lio i a rak tlaih mi hna lak ah Judah tlangval 4 hna cu Babilon ram chung i a um mi hna, mit lehthiam, kutttial zohthiam, hna le an cathiam hna nak in a let tam pi in siangpahrang hmai ah an cawi a rit deuh ti kan hmuh. Zei ruangah dah a si hnga, sal tang hna nih ram chungmi nak in an cawi a rit deuh hnga, Pathian lung an ton ruang ah a si. Zeitindah Pathian lung cu an ton zoh tuah hna uh sih. Babilon siangpahrang Nebukhadnezzar nih Isarael mi saltang hna lak ah, tlom pal kha thim i siangpahrang hna rian ah cun an luh awk a si lai a ti. Siangpahrang nih nifate in an ei awk hnga rawl le zu nan pek hna lai a ti. An cawm chung cu kum 3 a si lai i cu caan a dongh tik ah siangpahrang hna rian ah cun an lut lai ti in upadi a chuah. Cu hna lak ah cun Judah phun chungmi Daniel, Hananiah, Mishael le Azariah kha an i tel. Danial nih cun a zohkhenh tu boi cu a thawh i siangpahrang pek mi zu cun kan i thurhnawmh lai lo kan ding kan ei lai lo ti in a nawl. A zoh khen tu boi nih cun siangpahrang kha ka ttih, a mah nih na rawl ei awk le din awk kha an tuah piak, cucaah der fiamfuam in, na tthirual tlangval dang hei lo loin an hmuh ahcun ka lu ah ka hloh ko lai pei tiah a ti. Tlangval pa 4 hna nih cun a zohkhentu boi sin ah cun an va kal i NI 10 chung kan hneksak tuah. Ei awk ah tisik anhnah lawnglawng le ti long kan pe. Cun siangpahrang nih a phawt mi hna rawl in a nung mi tlangval dang hna he kan muisam cu kan zohkheh, cun na kan hmuh ningin kan cungah tuah an ti. A cawng tu hna nih cun an chim mi cu an ngaih i Ni 10 chung cu an hneksak hna. Ni hra donghnak ahcun siangpahrang nih a pek mi hna rawl in aa cenhmi tlangval vialte hna nak khan an ti sa cu a ttha deuh i an tlormal deuh. Bawipa mi thangthat si ko seh. Hi tlangval pa 4 hna hi an dih lak in PaThian nih ca lei fimnak le hngalhnak le thiamnak phunkip kha a pek hna i DaNial cu langhnak le mang sullam hngalh khawh nak kha a pek. Siangpahrang inn ah chuah pi an si lai ti ah a rak ti mi caan kha a hung phan i a zoh khen tu boipa nih cun Nebukhadnezzar hmai ah cun a chuah dih hna. Siangpahrang nih cun bia a ruah hna i a hohmanh an mah a tluk tu kha an um lo. Ramchung dihlak i mitlehthiam hna le kutttial zohthiam hna le camhthiam hna nak khan a let 10 in an thiam deuh ti kha kan hmuh, phun dang in chim ahcun a let hra in hoi dang nak in an rit deuh ti nak a si Halelluija.... Siangpahrang rian ah cun an lut. Phungthlukbia 14:34 ah miphun a lianngan ter tu cu din nak a si a ti. Babilon sal tang mi Judah tlangval pa 4 hna an fimnak, an thiamnak, an hngalhnak cu an Pathian ah asi. An Pathian an ttih, a hmai ah an ding an fel cu ruangah an hoi an lonh dih hna i siangpahrang rian ah an luh khawh nak a si. Cucaah ZoPhei mi phun zawng laimi lak ah miphun dang lak ah a fa cem, a hme cem le a hrut cem si hnanh uh sih a kan cawi san tu Pathian hmai ah kan din kan fel a si ahcun kan ngan chin lengmang lai kan fim chin lengmang lai kan hngalh, thiam chin leng mang ko lai. EU ram kan phan hnu cun a lulu in kan rum lai, kan fim lai, kan thiam lai ti hi ruat sual hlah uh sih. Danial 5:1 in tang lei kan rel tik ah Nebukhadnezzar fa pa Belshazzar kong kan hmuh khawh. A pa nih Jerusalem Biakinn in a rak lak mi sui hrai hna le ngun hrai hna kha zu din nak ah a hnan hna. Cucaah kutbor in vanpang ah ca a vun i ttial, cawithlai na si cang i na tling ti lo ti a si. Na pen nak cu Media mi cungah pek a si cang ti a si. Danial 5:30-31 ah cun cu zan hrimhrim ah cun Kaldi mi hna siangpahrang Belshazzar cu thah a si i Media mi Darius nih pen nak kha alak. Cucaah ZoPhei u le nau hna Bawipa cawithlai nak ah kan tlin lo a si ahcun EU ram kan phak zawng ah zei hnanh kan si hlei lai lo ,kan tthih tuan nak tu a si lai. Belshazzar nih Biakinn chungah chiah mi hrai zu din nak ah a hnan ruang ah Pathian a cung ah ai lom lo i zan khat ah thah a tong i a pen nak chuh a si ahcun, Hrai nak in a bia pi deuh mi kan pum Thiangthlarau Biakinn hi kan thurhnawm a si ahcun zei dah kan ton chinchin lai. Cucaah dawt mi ZoPhei u nau vial te hna, a cung lei i kan vun ttial cang bang a luan cia mi kan pi, pu, kan nu, pa chan nak cun kan tthang cho tuk cang, ser tu Pathian thong in, hi nak in a let in tthan cho kan herh rih, Jacob nih a pu Laban sin in a kir tik ah a kal lio nak in thlachuah a let tam pi he a kir ko nain, Pathian vaaaancung mi he zan khuadei an i pai i thlachuah na ka pek hlan lo kan thlah lai lo a ti bang, Rumnak, Fimnak, Thiamnak, Hngalhnak, Damnak, Nun khua sou nak thlachuah tam pi a herh rih mi mi phun kan si. Cu a si caah Judah tlangval pa 4 hna nih an Pathian hmai ah an din, an fel, an ttih nak thong in hoi nak in siangpahrang thin lung chungah a let tam pi in cawi an tlai i siangpahrang rian ah an luh khawh ban tuk in , Kan mi phun nih Pathian thin lung chungah cawi kan tlai maw? ti hi ruat peng hna uh sih. Joshua le Kalap nih Isareal mi hna nan thin phang hlah uh, nan ngaih zawng chia hlah seh Bawipa cu a doh del doh sawh hlah uh sih, Bawipa kan cungah ai lom a si ahcun a kan tiam mi ram cu kan co ko lai an ti. ZoPhei mi phun hoi dawt hna Bawipa kan cungah ai lomh ahcun Kan miphun, Kan nu kan pa, Nungak tlangval sa duh thah a tling te ko lai, Bawipa cu a doh bel doh sawh hlah uh sih. Nan cungah lunglomh nak tam pi ka ngei, kan palh mi a um ah cun Pathian tu nih kan ngai thiam seh law nan mah zong nih a ruahzia rak kan thiam uh tiah kan nawl hna. A bia kan ttial mi a rel tu nan dih lak cungah Pathian nih thluahchuah hram ko seh. Thawngtthabia ngaitu nan dihlak cung ah Pathian nih thluachuahnak in pe ko hna seh. Hmaizarh ah kan i tongtthan te hna lai. Lomhnak he, Khin Maung Denmark. ---end--- |
ZIT Sermon by Pu Zung Lian (5 APR 2009)
Sunday, April 5, 2009
at
Sunday, April 05, 2009
| |
Subscribe to:
Post Comments (Atom)
0 comments